Myllukrakkar lásu í meira en 107 þúsund mínútur!

Nemendur í 2.–7. bekk Myllubakkaskóla tóku þátt í Svakalegu lestrarkeppninni, landskeppni í lestri sem stóð yfir frá 15. september til 6. október. Alls tóku 108 skólar á Íslandi þátt í keppninni en markmið hennar er að auka lestraránægju barna.

Nemendur skólans lásu samtals í 107.247 mínútur, að meðaltali 634 mínútur á nemanda. Mest lásu nemendur í 2. og 4. bekk, en báðir árgangarnir náðu yfir 800 mínútna meðaltali á nemanda.

Þetta er í annað sinn sem skólinn tekur þátt í keppninni og lásu nemendur töluvert meira í ár en í fyrra. Það er ánægjulegt að sjá framfarir og áhuga nemenda aukast.

Við óskum nemendum til hamingju og hvetjum þá til að halda áfram að njóta lesturs.