Leið til læsis orðið að veruleika

Aðstandendur verkefnisins Leið til læsis afhentu í gær Gylfa Jóni Gylfasyni, fræðslustjóra Reykjanesbæjar, afurð sína í húsnæði Bæjarskrifstofu Reykjanesbæjar. Um er að ræða handbók og gagnabanka sem munu nýtast grunnskólakennurum í 1. - 4. bekk í lestrarkennslu og í sérkennslu.
Eva Björk Sveinsdóttir, Elínborg Sigurðardóttir og Heba Friðriksdóttir unnu ötullega að verkefninu fyrir hönd Myllubakkaskóla.  Leið til læsis er veigamesta verkfærið sem notað er í tengslum við lestrarstefnu Myllubakkaskóla.  Meginmarkmið verkefnisins eru eftirfarandi:
Að útfæra stafrænan verkefnabanka úr handbók Leið til læsis.
Auðvelda kennurum aðgengi að verkefnunum þar sem gerð þeirra er tímafrek.
Auka fjölbreytileika við nálgun á lestrarkennslu.
Auka líkur á góðum árangri hjá sem flestum nemendum í samræmi við framtíðarsýn Reykjanesbæjar.