Friðarveggspjaldakeppni Lionshreyfingarinnar

Myllubakkaskóli tók þátt í friðarveggspjaldakeppni Lionshreyfingarinnar en Lionshreyfingin hefur staðið fyrir slíkri samkeppni meðal ungs fólks á aldrinum 11-13 ára í nokkur ár. Keppnin hefur hvatt unglinga um allan heim til að tjá sig um framtíðarsýn þeirra um frið. Að þessu sinni var þema keppninnar það sem tengir okkur eða We are all connected. Það var 7. bekkur  Myllubakkaskóla sem sendi plaköt frá 17 nemendum en þau voru í myndmennt hjá Gunnhildi Þórðardóttur myndmenntakennara. Hafdís Friðriksdóttir frá Lionsklúbbnum Æsu kom svo færandi hendi eftir að hafa valið úr verðlaunahafa í tíma hjá 7. bekk sem var búin að koma sér vel fyrir í nýju húsnæði Myllubakkaskóla í Reykjaneshöll. Allir sem tóku þátt í samkeppninni fengu glaðning og verðlaunahafinn hlaut auk þess blóm og viðurkenningu en það var Brynhildur Þöll Bjarnadóttir sem þótti hlutskörpust og hennar verk mun fara svo í landskeppnina.