9. Stoðkerfi og þjónusta

9.1 Sérfræðiþjónusta
Fræðsluskrifstofan veitir sérfræðiþjónustu í samræmi við 40. grein grunnskólalaga.
Á Fræðsluskrifstofu hafa eftirfarandi sérfræðingar aðstöðu: sálfræðingar, talmeinafræðingur, sérkennslufulltrúi og kennsluráðgjafar. Sálfræðingur skólans er Hafdís
Kjartansdóttir.
Sálfræðingur veitir börnum, foreldrum/forráðamönnum og kennurum ráðgjöf og stuðningviðtöl og sinnir sálfræðilegri greiningu nemenda. Beiðni um sálfræðiaðstoð kemur frá kennurum og /eða foreldrum á sérstöku eyðublaði. Sálfræðingur veitir m.a. stuðningsviðtöl, gerir athugun og mat á þroska, líðan og hegðun. Að lokinni athugun gerir hann tillögur um úrbætur og aðstoð. Greininga- og stuðningsviðtöl fara fram í skólanum eða á fræðsluskrifstofu.
Talmeinafræðingur greinir tal- og málörðugleika og veitir meðferð.
Sérkennsluráðgjafi kemur að greiningu á námsörðugleikum og veitir kennurum og foreldrum ráðgjöf.

9.2 Nemendavendarráð
Í skólanum starfar nemendaverndarráð í samræmi við grunnskólalög 91/2008. Hlutverk þess er að samræma skipulag og framkvæmd þjónustu við nemendur varðandi heilsu-gæslu, námsráðgjöf og sérfræðiþjónustu og vera skólastjóra til aðstoðar við gerð og framkvæmd áætlana um sérstaka aðstoð við nemendur. Ráðið fundar einu sinni í viku og haldin er fundagerðarbók. Í nemendaverndarráði sitja skólastjóri/aðstoðarskólastjóri, umsjónarmaður sérkennslu, sálfræðingur skólans, sérkennslufulltrúi, námsráðgjafi og skólahjúkrunarfræðingur. Starfsmenn skólans og foreldrar/forráðamenn nemenda geta vísað málum til nemendaverndarráðs. Öll mál sem rædd eru í nemendaverndarráði eru trúnaðarmál.

9.3 Náms- og starfsráðgjöf
Við Myllubakkaskóla er starfandi náms- og starfsráðgjafi í fullu starfi. Hann er trúnaðarmaður og málsvari allra nemenda skólans. Nemendur geta leitað til ráðgjafans hvenær sem er og milliliðalaust með allt frá saklausum vangaveltum til minni eða stærri persónulegra vandamála.
Náms- og starfsráðgjafinn reynir eftir fremsta megni að eiga persónuleg dagleg samskipti við sem flesta af nemendum skólans. Þar til viðbótar veitir hann nemendum leiðsögn varðandi námstækni, skipulag og heilbrigt líferni, bæði með einstaklingsviðtölum og hópavinnu eftir því sem við á.
Mikilvægur þáttur í starfi ráðgjafans er að leiðbeina nemendum í elstu bekkjum skólans með val á framhaldsnámi og vangaveltur um framtíðina. Í því skyni fær hann alla nemendur 10.bekkjar í persónuleg viðtöl tvisvar á skólaárinu, að hausti og vori. Auk þess eru allir nemendur í 9. bekk boðaðir í eitt persónulegt viðtal eftir áramót.
Náms- og starfsráðgjafinn er bundinn þagnarskyldu um öll sín samskipti við nemendur, foreldra, starfsmenn skólans og aðra aðila sem hann starfar með.

9.4 Nemendasamtöl
Umsjónakennarar 7. - 10. bekkjar bjóða nemendum sínum upp á samtöl þar sem farið er yfir líðan í skóla, félagslega stöðu þeirra og annað það sem liggur á nemendum og kennarar telja æskilegt að ræða. Stefnt er að því að þessi samtöl fari fram tvisvar á skólaárinu.

9.5  Stuðningskennsla
Stuðningskennsla skal innt af hendi af sérkennara eftir því sem við verður komið eða vera undir umsjón sérkennara ef betur þykir henta að nemandi fái stuðningskennslu hjá umsjónarkennara eða öðrum kennurum. Nemendur, sem ekki ráða við námsmarkmið bekkjarins, fá stuðningskennslu í íslensku og stærðfræði. Í sumum tilvikum aðstoða starfsmenn skóla sérkennslunemendur inni í bekk. Umsjónaraðili sérkennslu/deildarstjóri raðar nemendum í hópa. Stuðst er við prófskýrslu frá vori og skýrslur frá sérfræðingum. Samráð er einnig haft við umsjónarkennara viðkomandi nemenda. Deildarstjóri/ umsjónaraðili með sérkennslu setur saman stundaskrár nemenda, kenn-ara og stuðningsfulltrúa. Sérkennslunemendur stunda ýmist nám alfarið í námsveri eða tímabundið, fara einstaka tíma út úr bekk í aðstoð og /eða fá aðstoð inni í bekk. Náms- og kennsluefni er við hæfi hvers og eins.
Undanþágur frá aðalnámskrá eru í samræmi við kafla í almenna hluta aðalnámskrár grunnskóla sem fjallar um undanþágur (Aðalnámskrá 2006, almennur hluti, bls. 25).

9.6 Beiðnir um stuðning
Á hverju vori fylla umsjónarkennarar út beiðni um sérkennslu fyrir næsta skólaár. Auk þess berast beiðnir um sérkennslu yfir skólaárið flestar í kjölfar prófa og foreldradaga. Stefnt er að því að koma til móts við allar beiðnir um stuðning annað hvort með því að nemandi fái sérkennslu eða með því að veita stuðning inni í bekk.

9.7 Beiðnir um sérfræðiaðstoð
Umsókn um sérfræðiþjónustu berist til nemendaverndarráðs á sérstöku eyðublaði sem fæst hjá ritara. Í ákveðnum tifellum þarf að fylla út/ svara spurningalistum sem fylgja beiðninni. Þegar beiðnin hefur verið samþykkt fá foreldrar tilkynningu þess eðlis og upplýsingar um þann sem hefur umsjón með málinu. Umsókn þarf alltaf að vera samþykkt af foreldrum/forráðamönnum og undirrituð af þeim.

9.8 Einstaklingsnámskrár
Einstaklingsnámskrár eru unnar fyrir þá nemendur, sem njóta stuðningskennslu í íslensku og stærðfræði og eru unnar af þeim kennurum sem sjá um kennsluna í samráði við umsjónarkennara.

9.9 Fjölþjóðadeild
Í Fjölþjóðadeild er kennd íslenska sem annað tungumál. Íslenska sem annað tungu-mál er námsgrein fyrir nemendur sem hafa ekki nægilegt vald á íslensku til að geta stundað nám í íslenskum skólum til jafns við aðra nemendur. Þetta á jafnt við um nemendur af íslenskum og erlendum uppruna (Aðalnámskrá grunnskóla, íslenska sem annað tungumál, bls. 20).
Í Fjölþjóðadeild Myllubakkaskóla sækja tíma nemendur sem ýmist eru af erlendum uppruna eða íslenskir nemendur sem hafa búið erlendis í lengri eða skemmri tíma. Þessir nemendur tilheyra sínum bekk en sækja íslenskutíma í Fjölþjóðadeild. Einnig er veitt aðstoð í öðrum greinum ef þörf krefur og þá í samstarfi við bekkjarkennara. Deildar-arstjóri Fjölþjóðadeildar sér um að skipuleggja kennsluna í samvinnu við bekkjarkennara.

9.10 Geymsla gagna
Trúnaðarskjöl eru þau gögn sem skólinn varðveitir frá sérfræðingum og hafa m.a. að geyma upplýsingar um niðurstöður greininga yfir nemendur. Foreldrar eiga jafnan eintak af þessum gögnum en ef svo er ekki eiga þeir rétt á að fá afrit af þeim. Þessi gögn fara ekki á milli skóla nema með skriflegu samþykki foreldra.

9.11 Áfallaráð
Áfallaráð fer með verkstjórn þegar áföll verða, s.s. bráð veikindi, alvarleg slys, dauðsföll eða aðrir válegir atburðir sem snerta nemendur og / eða starfsmenn skólans. Áfallaráð skipa: Skólastjóri, aðstoðarskólastjóri, námsráðgjafi, skólasálfræðingur og prestur er kallaður til ef þurfa þykir. Skólastjóri eða staðgengill hans kallar áfallaráð saman.

9.12 Einelti
Einelti er ekki undir neinum kringumstæðum liðið í Myllubakkaskóla. Hlutverk allra starfsmanna skólans er að vera vakandi fyrir líðan og velferð nemenda. Mikilvægt er að hver sá sem verður var við einelti komi þeirri vitneskju til umsjónarkennara. 
Vakni grunur um einelti fer í gang markvisst ferli sem skiptist í þrjú stig: 1) könnunarstig 2) aðgerðastig 3) sértæk úrræði. Að loknu hverju stigi er farið ítarlega yfir stöðu málsins, gögnum safnað og næstu skref ákveðin. Ferlinu er stýrt af aðgerðahópi sem í sitja skólastjóri, námskráðgjafi og umsjónarkennari þolanda.

9.13 Hjúkrunarfræðingur / heilsugæsla
Heilsuvernd í skólum Reykjanesbæjar er í höndum hjúkrunarfræðinga Heilbrigðis-
stofnunar Suðurnesja. Markmiðið er að fylgjast með andlegum, félagslegum og líkamlegum þroska nemenda ásamt því að veita ráðgjöf og gera ráðstafanir til lagfæringar ef eitthvað er að. Byggt er á hugmyndafræðinni um 6-H heilsunnar sem er samstarfsverkefni skólaheilsugæslunnar og Lýðheilsustöðvar. Áherslur fræðslunnar eru Hollusta - Hvíld - Hreyfing – Hreinlæti - Hamingja - Hugrekki og kynheilbrigði.
Fræðsla
Skólahjúkrunarfræðingur sinnir fræðslu fyrir ákveðna bekki eftir því sem við verður komið.

Líkamlegt eftirlit
Ef ástæða þykir til vísar skólahjúkrunarfræðingur nemanda til læknis. Skólahjúkrunarfræðingar sjá um heilsufarsskoðanir auk ónæmisaðgerða í þeim bekkjum sem við á og eru þær sem hér segir :
1. bekkur: Hæð, þyngd og sjónpróf
4. bekkur: Hæð, þyngd og sjónpróf
7. bekkur: Hæð, þyngd og litaskynspróf og bólusetning gegn mislingum og rauðum hundum
9. bekkur: Hæð, þyngd, sjónpróf, heyrnarpróf og blóðþrýstingur athugaður. Bólusetning gegn mænusótt (Polio) og barnaveiki og stífkrampa (dT). Send er tilkynning heim með nemendum fyrir bólusetninguna. Nemendur fylla út eyðublað varðandi eigið heilbrigði.
Þeir foreldrar sem þess óska geta fengið viðtal við skólahjúkrunarfræðing.

9.14 Lyfjagjafir
Í flestum skólum eru ávallt einhver börn sem þurfa að taka inn lyf á skólatíma. Í engu tilviki getur barn borið ábyrgð á lyfjatöku. Ábyrgðin er foreldra / forráðamanna en skólahjúkrunarfræðingur og starfsmenn skólans aðstoða barnið við lyfjatökuna ef þess er kostur. Hjúkrunarfræðingur skólans skal hafa upplýsingar um allar lyfjagjafir barna í skólanum og ber foreldrum og lækni barnsins að undirrita eyðublað varðandi lyfjagjöf (eyðublað hjá hjúkrunarfræðingi).

9.15 Flúor
Sjúkraliðar á vegum Heilbrigðisstofnunar Suðurnesja sjá um að nemendur 1., 7. og 10. bekkjar skólans fá flúorskolun en stefnt er að því að flúorskolun verði á tveggja mánaða fresti þrjá daga í röð eða alls tólf skipti yfir skólaárið.

9.16 Tannvernd
Skólahjúkrunarfræðingur mun sjá um tannfræðslu í 1., 4. og 7. bekk en tannfræðingur á vegum Lýðheilsustöðvar mun heimsækja nemendur 5., 8. og 10. bekkjar og fræða þá um umhirðu tanna og tannvernd.

9.17 Lús
Foreldrar eru minntir á að athuga vel hár og hársvörð barna sinna í upphafi skólaárs þar sem lúsar verður vart á hverju hausti. Hlutverk skólahjúkrunarfræðings felst ekki í því að leita að lús eða kemba börnunum heldur vera ráðgefandi meðferðaraðili fyrir foreldra og skóla. Því er þeim tilmælum beint til foreldra og forráðamanna barna að láta skólahjúkrunarfræðing vita ef barn fær lús. Samkvæmt tilmælum frá sóttvarnalækni er þetta skráningskylt og farið er með þessar upplýsingar sem trúnaðarmál eins og sjúkraskrárupplýsingar.

Til baka í efnisyfirlit