8. Nám og kennsla

8.1 Skólasetning
Skólasetning fer fram á sal skólans fyrsta dag hvers skólaárs. Að lokinni skólasetningu, sem er aldursskipt, fylgja nemendur umsjónarkennara til heimastofu þar sem ýmsum upplýsingum er komið til nemenda og foreldra/forráðamanna. Foreldrar/forráðamenn eru hvattir til að mæta ásamt börnum sínum á skólasetningu.

8.2 Skólaslit
Skólaslit eru síðasta dag hvers skólaárs. Skólaslit, sem fara fram á sal skólans, eru aldursskipt. Á skólaslitum eru veittar viðurkenningar fyrir námsárangur, hegðun og umgengni einstaklingum og hópum. Sérstök viðurkenning ,,Kennaraeplið” er veitt nemanda 10. bekkjar fyrir ábyrgð, jákvæðni og tillitssemi. Að lokinni athöfn á sal fara nemendur ásamt umsjónarkennurum sínum í heimastofu þar sem þeir fá vitnisburðarblöð afhent. Foreldrar/forráðamenn eru hvattir til að koma með börnum sínum á skólaslit.

8.3 Kennsluskipan
Myllubakkaskóli er heildstæður grunnskóli fyrir nemendur á aldrinum 6 - 16 ára. Kennsla hefst kl. 8:10 á morgnana og lýkur kl. 14:40 en valgreinatímum 9. og 10. bekkjar lýkur kl. 15:20. Í heimilisfræði og myndmennt, textíl og tæknimennt er flestum bekkjum skipt í tvo hópa og fær hvor hópur kennslu hálfan vetur í greininni. Skipt er um áramót. Sundkennsla fer fram í Sundmiðstöðinni og fá nemendur einn sundtíma í hverri viku. Nemendur 7. - 10. bekkjar sækja íþróttakennslu í Íþróttamiðstöð Keflavíkur við Sunnubraut en nemendur 1.- 6. bekkjar í íþróttahús Myllubakkaskóla. Tónmennta-kennslu njóta allir nemendur í 3. - 6. bekk en nemendur 1. og 2. bekkjar fá fornámskennslu tónlistarnáms sem kennari Tónlistarskóla Reykjanesbæjar annast.

8.4 Heimanám
Heimanám er hluti af námi nemenda þar sem foreldrum gefst jafnframt tækifæri til að fylgjast með námi barna sinna. Áhugi foreldra, hvatning og þátttaka í námi barna sinna skiptir miklu máli hvað varðar gengi og árangur í skóla. Nemendur vinna eftir áætlun sem ýmist er unnin af bekkjarkennara eða er samvinnuverkefni nemenda, kenn-ara og foreldra. Nemendur á unglingastigi, 8. - 10. bekkur, skrá sjálfir heimavinnu í skóladagbók (kompu).

8.5 Námsgögn
Skólinn útvegar kennslugögn og allar almennar námsbækur og eru þær endurnýttar eins og hægt er. Ef nemendur glata bókum í eigu skólans þurfa þeir að kaupa nýjar. Nemendur sjá sjálfir fyrir ritföngum og stílabókum (blöðum) og rúðustrikuðum bókum (blöðum). Hljóðbækur og hlustunarefni sem Námsgagnastofnun gefur út er nú aðeins gefið út á netinu til niðurhals. Nemendur geta með aðstoð foreldra nýtt sér bækurnar, t.d. með því að setja efnið yfir á I-podi eða á MP3 spilara. Nánari upplýsingar er að finna á http://www.nam.is/.

8.6 Námsmat
Skólaárinu er skipt í tvær annir og lýkur hvorri önn með námsmati í formi prófa og mats sem staðið hefur alla önnina. Viðhafðar eru fjölbreyttar leiðir við matið hverju sinni og leitast við að meta þætti eins og virkni og vinnulag nemenda en einnig er tekið mið af verkefnaskilum og þeim könnunum sem lagðar eru fyrir á önninni. Námsmat er einn af föstum þáttum skólastarfsins, órjúfanlegt frá námi og kennslu.
Námsmat miðar að því að afla sem öruggastar vitneskju um árangur skólastarfsins og hvernig einstaka nemanda eða hópum gengur að ná settum markmiðum.
Megintilgangur námsmats er að afla upplýsinga sem hjálpa nemendum við námið, örva þá og hvetja til að leggja sig enn betur fram. Miklu máli skiptir að nemendur viti fyrirfram hvaða þættir verða metnir og hvaða kröfur skólinn gerir til þeirra.
Nemendur fá einkunnir sínar, sem eru í formi talna (heilum og hálfum), orða og/eða umsagna, á vitnisburðarblöðum í lok anna.
Nemendur sem eru með greiningu um náms- og eða hegðunarraskanir er boðið upp á ýmis konar stuðning við prófatöku, svo sem að taka próf í fámennari hópi, fá lengri próftíma og aðstoð við lestur og/eða skrift. Tekið er tillit til mismunandi þroska, getu og bakgrunns nemenda við matið.

8.7 Samræmd próf
Samræmd könnunarpróf í íslensku og stærðfræði eru lögð fyrir alla nemendur í 4. og 7. bekk í september ár hvert. Frá og með hausti 2009 mun það sama gilda um nemendur 10. bekkjar en þeir munu þá taka samræmd könnunarpróf í þremur greinum, þ.e. íslensku, stærðfræði og ensku. Þar með falla niður samræmd lokapróf í 10. bekk. Tilgangur samræmdra könnunarprófa er að athuga, eftir því sem kostur er, hvort námsmarkmiðum aðalnámskrár í viðkomandi námsgrein eða námsþáttum hafi verið náð. Niðurstaðan á að vera leiðbeinandi um áherslur í kennslu einstakra nemenda og hópa. Einnig er tilgangurinn að veita foreldrum upplýsingar um námsárangur og námsstöðu nemenda.
Skólastjóra er heimilt að veita nemendum undanþágu frá því að taka samræmd könnun-arpróf ef fyrir liggja gildar ástæður og samþykki foreldra.
Foreldrar hafa rétt á að skoða metnar prófúrlausnir barna sinna. Jafnframt hefur nem-andi og foreldri/forráðamaður rétt til að skoða þau gögn sem liggja til grundvallar hvers konar skriflegum vitnisburði um námsstöðu nemandans.

8.8 Valgreinar
Kennslustundir nemenda í elstu bekkjum, 9. og 10. bekk, eru 37 stundir á viku. Nám í kjarnagreinum er 32 stundir - nemendur í 9. og 10. bekk þurfa því að velja sér viðbótargreinar, samtals 5 kennslustundir, af valframboði skólans. Framboð námsgreina getur verið mismunandi frá ári til árs en auk þess geta nemendur 10. bekkjar valið að taka áfanga í bóklegum og verklegum greinum í Fjölbrautaskóla Suðurnesja. Þeir nemendur sem stunda nám í Tónlistarskóla Reykjanesbæjar geta fengið tónlistarnámið metið sem valgrein. Það sama gildir um þá nemendur sem stunda íþróttir á vegum íþróttafélaganna í Reykjanesbæ. Á vormánuðum eru valáfangar kynntir fyrir nemendum og forráðamönnum þeirra og í framhaldi velja nemendur sér námsgreinar í samráði við foreldra /forráðamenn.

8.9 Starfskynning í 10. bekk
Nemendur 10. bekkjar fara í starfskynningu á vorönn. Markmiðið er að nemendur
kynnist atvinnulífi nærsamfélagsins og þeim réttindum og skyldum sem gilda um
launþega. Kynningin dreifist á einn til tvo daga og getur bæði farið fram innan veggja
skólans og utan hans og er ýmist í formi vinnustaðaheimsókna eða fyrirlestra.

Til baka í efnisyfirlit