3. Stjórnun og starfssvið

3.1 Stjórnun grunnskóla
Menntamálaráðuneytið fer með yfirstjórn þeirra málefna sem grunnskólalög segja til um og hefur eftirlit með því að sveitarfélög uppfylli þær skyldur sem reglugerðir við þau og Aðalnámskrá grunnskóla kveða á um. Ráðuneytið skal fylgjast með að allir grunnskólar landsins eigi kost á sérfræðiþjónustu og að nemendur sem ekki geta notið kennslu með fullnægjandi hætti í almennum grunnskóla fái kennslu við hæfi. Menntamálaráðuneytið annast söfnun og dreifingu upplýsinga um skólahald og skólastarf á grunnskólastigi. Menntamálaráðherra gerir Alþingi grein fyrir framkvæmd skólastarfs í grunnskólum landsins á þriggja ára fresti.

3.2 Fræðsluráð
Fræðsluráð fer með málefni grunnskóla samkvæmt lögum og reglugerðum um grunnskóla, sveitarstjórnarlögum og samþykktum bæjarstjórnar. Ráðið starfar skv. ákvæðum grunnskólalaga nr. 91/2008. Formaður fræðsluráðs er Garðar Vilhjálmsson.

3.3 Fræðsluskrifstofa
Fræðsluskrifstofa Reykjanesbæjar fer með yfirstjórn menntamála bæjarfélagsins.
Markmið fræðsluskrifstofu er að gefa skólunum kost á sem víðtækastri sérfræði-þekkingu þannig að hún nái að veita kennslufræðilega og sálfræðilega ráðgjöf og aðstoð við umbóta- og þróunarstarf. Fræðsluskrifstofan hefur yfirumsjón með áætlanagerð og rekstri skólanna og úrvinnslu launaskýrslna fyrir skóla Reykjanesbæjar.
Fræðsluskrifstofan er opin alla virka daga frá kl. 8:30 - 15:30 og er til húsa á 2. hæð að Tjarnargötu 12. Fræðslustjóri er Eiríkur Hermannsson.

3.4 Skólastjóri / aðstoðarskólastjóri
Skólastjóri er forstöðumaður grunnskóla, stjórnar honum og ber ábyrgð á starfi skólans og veitir honum faglega forystu. Aðstoðarskólastjóri er staðgengill skólastjóra í fjarveru hans. Skólastjórar skipuleggja skólastarfið í samráði við alla aðila skólasamfélagsins. Skólastjórar sinna daglegum rekstri, starfsmannahaldi, samskiptum við foreldra, nem-endur og aðra aðila utan skólans.

3.5 Deildarstjóri
Deildarstjórar/verkefnastjórar sjá um ákveðin verkefni innan skólans. Þeir eru millistjórnendur sem fara með mannaforráð og stýra hluta af skólastarfi, deild eða skólastigi eftir nánari ákvörðun skólastjóra. Þeir funda reglulega með skólastjórnendum og kennurum.

3.6 Fagstjóri
Meginhlutverk fagstjóra er að vera faglegur ráðgjafi í einstökum faggreinum. Hann starfar undir stjórn deildarstjóra og skólastjórnenda. Fagstjóri hefur umsjón með þeirri námsgrein sem hann er fagstjóri yfir. Hann leiðbeinir og er ráðgefandi þegar kemur að kennsluefni, kennsluháttum og prófagerð þeirrar greinar sem hann er fagstjóri yfir. Fagstjóri fylgist með að eðlileg samfella sé í náminu milli árganga. Hann fylgist með nýjungum, sækir námskeið, kynningarfundi og aðra fundi sem tengjast starfinu.

3.7 Skólaráð
Skólaráð er samráðsvettvangur skólastjóra og skólasamfélags um skólahald og tekur þátt í að marka stefnu skólans. Skólaráð fær til umsagnar skólanámskrá, árlega starfsáætlun og aðrar áætlanir um skólastarfið. Skólaráð fylgist með velferð nemenda, aðbúnaði og öryggi. Fræðsluráð (skólanefnd, sbr. 6. gr.), getur með samþykki sveita-stjórnar falið skólaráði að vinna að ákveðnum verkefnum.
Í skólaráði sitja níu einstaklingar til tveggja ára í senn, tveir fulltrúar kennara og einn fulltrúi annars starfsfólks skólans og eru þessir aðilar kosnir á starfsmannafundi, tveir fulltrúar nemenda sem eru tilnefndir af nemendaráði, tveir fulltrúar foreldra tilnefndir af foreldrafélagi skólans auk skólastjóra sem stýrir skólaráði. Skólaráð velur að auki einn fulltrúa grenndarsamfélags til setu í ráðinu eða viðbótarfulltrúa úr hópi foreldra. Skólastjóri skal boða til sameiginlegs fundar skólaráðs og stjórnar nemendafélags að lágmarki einu sinni á ári.

3.8 Kennarafundir
Kennarafundur er skólastjóra til ráðuneytis um innra starf grunnskóla og daglega stjórn hans. Skólastjóri eða aðstoðarskólastjóri boðar til kennarafunda en kennarar annast fundarstjórn og skrifa fundagerðir. Skólastjóri boðar til kennarafundar svo oft sem þurfa þykir en þó eigi sjaldnar en einu sinni í mánuði. Auk þess skal boða til slíks fundar ef þriðjungur kennara skólans æskir þess. Fundartími er á miðvikudögum frá 14:45 - 16:00. Kennarafundir, stigsfundir og teymisfundir skiptast á með nokkuð reglubundnum hætti.

3.9 Starfsmannafundir
Fundir með öllum starfsmönnum skólans eru haldnir svo oft sem þurfa þykir en þó eigi sjaldnar en tvisvar á hvorri önn. Skólastjóri eða aðstoðarskólastjóri boðar til starfs-mannafunda en starfsmenn annast fundarstjórn og skrifa fundagerðir.

Til baka í efnisyfirlit