15. Umbóta- og þróunarstarf

15.1 PBS - styrking jákvæðrar hegðunar
Skólaárið 2006-2007 var stofnað teymi til að undirbúa og innleiða nýjar umgengnis-reglur í skólastarfi. Reglurnar byggja á heildstæðum stuðningi við jákvæða hegðun (PBS – Positive Behavior Support). Áhersla er lögð á að kenna og umbuna fyrir æskilega hegðun. Umbun beinist bæði að einstaklingum og hópum.
Markmiðið er að ná fram meiri árangri í námi og kennslu og betri mannlegum samskiptum. Notað er lýsandi hrós og bent á það sem vel er gert en það leiðrétt sem miður fer. Nálgunin beinist að skólanum í heild ekki síður en einstaka nemendum í mati og fyrirbyggjandi aðgerðum.
Einkunnarorð skólans eru: VIRÐING – ÁBYRGÐ – JAFNRÉTTI - ÁRANGUR og umgengnisvæntingar eru settar samkvæmt þeim fyrir hvert svæði, t.d. matsal, ganga, íþróttahús, tölvunotkun o.s.frv.
Í undirbúningsteyminu starfa 10 starfsmenn skólans og Hafdís Björg Kjartansdóttir skólasálfræðingur er handleiðari hópsins. Teymið fundar 1 - 2 sinnum í mánuði. Gert er ráð fyrir að það taki 3 - 5 ár að koma þessu verklagi á.

15.2 Mætingar og ástundun
Til að undirstrika þá grundvallarskyldu nemenda að mæta í allar kennslustundir, voru settar nýjar mætingareglur á unglingastigi í janúar 2009. Allir nemendur skrifa undir samning um mætingar, ásamt forráðamanni og umsjónarkennara. Hann felst í því að allir þessir aðilar skuldbinda sig til að tryggja að nemandinn uppfylli mætingaskylduna. Nemendur sem fá skráðar á sig óheimilar fjarvistir, umfram tiltekin mörk, þurfa að inna af hendi skólaþjónustu.
Á sama hátt og í PBS kerfinu, er einnig lögð áhersla á að beina athyglinni að æskilegri hegðun hvað varðar mætingar og ástundun. Í þeim anda er í hverri viku hengdur upp listi með nöfnum þeirra nemenda á unglingastigi sem mætt hafa í allar kennslustundir undangenginnar viku og ekki fengið neina athugasemd.

15.3 Vinir Zippýs
Vinir Zippý eða „Zippy´s Friends“ er alþjóðlegt forvarnarverkefni sem Lýðheilsustöð hleypti af stokkunum árið 2005. Námsefnið sem ætlað er 6-7 ára börnum hefur verið notað með góðum árangri víða um heim.
Markmiðið er að þjálfa með börnunum leikni til að ráða fram úr erfiðleikum sem mæta þeim í daglegu lífi, átta sig á ýmsum tilfinningum sem bærast með þeim og að tala um líðan sína við aðra. Einnig fá þau áhuga á að aðstoða aðra sem eiga við erfiðleika að stríða.

15.4 Sjálfsmat
Í lögum um grunnskóla 91/2008 eru ákvæði um sjálfsmat skóla. Megintilgangur með sjálfsmati í Myllubakkaskóla er að taka saman upplýsingar um skólastarfið, vinna að framgangi markmiða skólans, kanna hvort þeim hafi verið náð og nýta niðurstöðurnar til umbóta og frekari þróun skólastarfsins. Með sjálsmati er mögulegt að greina styrkleika og veikleika skólans. Matið er altækt og nær til allra þátta skólastarfsins og beinist að nemendum, foreldrum, kennurum og starfsfólki skólans. Sjálfsmatsáætlun er gerð til þriggja ára og er unnin af sjálfsmatsteymi skólans.

15.5 Áherslur skólaárið 2009 - 2010
Eftirfarandi teymi eru að starfi ýmist allt skólaárið eða að hluta:

Einelti
Þemadagar – opinn dagur, árshátíð og íþróttadagur
PBS
Sjálfsmat
Náms- og kennsluefni í stærðfræði
Náms- og kennsluefni í íslensku
Verk – og listgreinar

Markmiðið er að teymin komi með hugmyndir og tillögur til úrbóta í þeim verkefnum sem þau vinna að. Niðurstöður úr teymisvinnu eru síðan kynntar starfsmönnum. Teymin hafa fastan fundartíma, haldin er fundargerðarbók og skýrslu skilað í lok tímabils.

Til baka í efnisyfirlit